यमुना गाड़ा रे मियड नमा बैक्टिरिया नमा कना । नेन बैक्टिरिया हसा रेयः मेटल (धातु) चि मे’ड दिरि, बिचादिरि, चेटरेदिरि, रुगुडदिरि, सिगिडदिरि को जोम लुपुःउ केहते बोदारेः बाईयः। साह’रेयाःए । नेन बैक्टिरिया रेयः देंगाते बंजर बांजी ओते रेयः हसाको चास लायक बाई दईयोःआ। ‘जीवनी बायोफर’ नुतुमते मियड नमा प्रोजेक्ट दिल्ली राज्य सरकार तःअ् रे ओमाकना । जुदि एक्सपेरिमेन्ट लेबल रे नेया योजना सफल यना ओन्डोः पास यना एनरेदो कोल्हान रेयः चास ओते लगिड ओन्डोः चासतन को देंगा रे पईटि रेबु आगुईया। नेन जगर को आबु लगिड ओमकुले तनलोःते दिल्ली राज्य सरकारःअ् गुरुगोविन्द सिंह, इन्द्रप्रस्थ विश्वविद्यालय रे युनिवर्सिटी स्कूल आॅफ बाॅयोटेक्नोलाॅजी विभाग रे ‘‘क्रोप्स इम्प्रुवमेन्ट’’ क्षेत्र रेकिन रिसर्च तना ओन्डोः एसोसिएट प्रोफेसर अकाना किन डाॅ. रामसिंह पुरती तिकिन।
सरायकेला-खरसवां जिला रेयः अर्जुनबिला हातु अयतेन हो युवा ओन्डोः डाॅ. रामसिंह पुरती तिकिन सिरमा 1993-96 रे बी0जे0बी0 काॅलेज अयते बाॅटनी आनर्स इडकेहते विज्ञान विषय रेकिन ग्रैजुएशन केना। सिरमा 1996-98 रे कालिकट विश्वविद्यालय केरल अयते बायो टेक्नोलाॅजी रे एमएससी ओन्डोः सिरमा 1998-2004 रे दिल्ली विश्वविद्यालय अयते प्लान्ट बायो टेक्नोलाॅजी रेकिन पीएचडी डिग्री किन तेलाकेडा । आकिनः पीएचडी डिग्री सोमोय रेगे सिरमा 1997-2000 रे मियड रिसर्च लैब तियर केहते दःअ् कोमगे तईन टयड रे चास रे देंगा ओमेतन मियड जी’न किन नम ओलकेडा। आकिन मेनेया चि ‘‘प्लान्ट बायोटेक्नोलाॅजी रे नेया को पड़ाव होबाना चि ओकोन ओकोन समय, स्थिति, हासा, दःअ् रेयः देंगातेदारु को जी’ड ताईना ओन्डोः दारु दुम्बु को जी’ड ताईन लगिड ओकोन ओकोन बायोटेक जी’न आईसोलेशन को देंगा एमेया, ओकोन जी’न ट्रांसजेनिक प्लान्ट बाई दईयोःआ ओन्डोः ओकोन जी’न कोरे चेकन इन्फोर्मेशन उकु दनङ अकाना। अ´ः मियड कुमु ताईकेना चि चाउलि चास दिषुम लगिड एनकन इन्फोर्मेशन नम ओन्डोंङेया´ ओकोना चि चास तनको पुरःअ् तेको चास दईचा। एना लगिड राईस जीनोम प्रोजेक्ट ओन्डोः 50 मेडिकल प्लान्ट रेयः नर्सरी सिरमा 2000 रे तियर यना। ’’
दिल्ली विश्वविद्यालय रेयः बाॅटनी विभाग अयते पीएचडी थीसेस ‘‘ इफेक्ट आॅफ ए बायोटिक स्ट्रेस आॅन सेसबानिया सेसबन वार बाइकलर आइसोलेशन, क्लोनिंङ एन्ड कैरेक्टराईजेशन आॅफ जी’न एन्कोडिंग बाॅयलिंङ स्टेयबल प्रोटीन ’’ लेकाते मियड नमा जी’न किन नम ओन्डोङ तडा। नुतुम दो तना ‘‘बाॅयलिंङ स्टेयबल प्रोटीन’’। आकिनःअ् नेन शोध लेख चेकोस्लोवाकिया अयते चपवओल्ल तन मियड अंतर्राष्ट्रीय पत्रिका ‘ बाइलाॅजिया ’प्लान्टेरियम रे 2004 रे स्थान नमतडःए। आकिन शोध नमतड नमा जी’न ‘‘बाॅयलिंङ स्टेयबल प्रोटीन’’ खूबी चेनःअ् तना?… नेन जी’न 100 डिग्री सेंटीग्रेड रे ओकोन तापमान रे दःअ् बोड़ोकावोःआ, इमिन लोलो तापमान रेयोः जी’ड गे ताईना, माने बाॅयलिङ टेम्पे्रचर रे ओकोन दुम्बु दारु कोरे नेन जी’न ताईना एना हरा भरा ओन्डोः जी’डगे ताईना। डाॅ. रामसिंह पुरती तिकिन आकिनःअ् नुतुमते नेन नमा जी’न (पेटेन्ट नम्बर ।श्र582752 ) ईएमबीएल जी’न बैंक युके रेकिन पेटेन्ट इचितडा।
नेन उपलब्धि ओन्डोः गोनोङ दो नेनागे चि आकिनःअ् नेन रिसर्च विषय रे गेस्ट लेक्चरर रेयः आॅफर युनिवर्सिटी आॅफ कैलीफोर्निया,युएसए, मिचिगन स्टेट युनिवर्सिटी युएसए, टेक्सास युनिवर्सिटी युएसए, ओन्डोः वेस्टर्न आॅस्ट्रेलिया नेन उपुनिया विश्वविद्यालय अयते किन नमलेडा। आकिन एन अवसर रे मिचिगन स्टेट युनिवर्सिटी युएसए, किन सलाकेडा ओन्डोः विदेश प्रवास किन सेनेयन ताईकेना। नेया हो दिषुम कोल्हान दिषुम रेयः एसु गौरवपूर्ण क्षण ताईकेना।
पांजादईया किनाबु- डाॅ. रामसिंह पुरती, Mail : [email protected]