दुर्गा बानसिंह
सिरमा 1991-1993 ओन्डोः सिरमा 1993 अयते 1999 जोङ एटेःए तुरतुङ सुल्ल पिटिका आकड़ा रेन अध्यक्ष सिरमा 1960-1990 जोङ उपाध्यक्ष एन चनब 1999 अयते सह-सचिव दुर्गा बानसिंह तिकिनः जोनोम मसमत 1939 रेयः 1 जनवरी मुसिङ इमिता दो सिंहभूम नाःअ् दो सरायकेला खरसवां जिला रेयः निलमोहनपुर हातु रे होबालेना। झारखण्ड आंदोलनकारी दुर्गा बानसिंह तिकिन ओत्गुरु लको बोदरा तिकिनःअ् एसु दुलड़ शिष्य किन ताईकेना ओन्डोः आकिन सिरमा 1967 रे झारखण्ड भूमि बचाओ आंदोलन लगिड बइलेन बिरसा सेवा दल रेन संस्थापक अध्यक्ष किन ताईकेना। मसमत 1962-64 सत्र रे बारीपदा (उड़ीसा) अयते आईटीआई केनते टायो गम्हारिया रेकिन पइटि केना। आकिन आजीवन भाषा लिपि रेयः प्रचार प्रसार लगिड किन कुरुमुटु केना ओन्डोः झारखण्ड राज्य रे हो द्वितीय राजभाषा दर्जा नमे लगिड एसु मरङ योगदान किन ओमकेना। आकिन 24 फरवरी 2023 मुसिङ सोमयझोपड़ी रेकिन दनङ बागेयड बुवा।
महीपाल बुड़ीउली
बिहार स्टेट हाॅकी टीम रेन सदस्य केरसे बुड़ीउली तिकिनःअ् होनसेड् ओन्डोः एसु नुतुमन हो ड्रामा लेखक निर्देशक महीपाल बुड़ीउली तिकिनः जोनोम मसमत सिरमा 1934 रे 27 मार्च मुसिङ झींकपानी प्रखण्ड रेयः बिष्टुमपुर बगान साई हातु रे होबालेना। टाटा स्टील कर्मी ओन्डोः काॅ-आॅपरेटिव काॅलेज बिष्टुपुर अयतेन स्नात्तक महीपाल तिकिनःअ् जीवनकाल रे तत्कालीन हो समाज परिवेश रे होबन तन सामाजिक घटना कोरेयः उसुर एनका होबायना चि आकिन समाज सुधार रेयः उड़ुःउ उद्देश्य लगिड पेन पोल्टेन किन सब सोजेकेडा ओन्डोः उपुनिया मरङ मरङ हो ड्रामा किन ओल बपड केना। आकिन 15 सितम्बर 2012 मुसिङ दनङ यन अयरते सिरमा 1962 रे पहला हो ड्रामा दोष ओकोयः (तृतीय संस्करण 1977), सिरमा 1975 रे दूसरा हो ड्रामा ओकोना बुगिना, सिरमा 1976 रे तीसरा हो ड्रामा आबिनःअ् उड़ुः, ओन्डोः सिरमा 1982 रे चैथा हो ड्रामा ओकोये काजी दईयः एमनको ओलकेनःए ओन्डोः नेन ड्रामा कोरेयः स्टेज को एडीएल सोसाईटी हाॅल ओन्डोः आदिवासी एसोसिएशन सीतारामडेरा कोरे होबालेना।
डुबराज बानरा
पाटा टांगोर पाडे़या को गेह होन ओन्डोः कुरसी अयतेन पाडे़या को अरा होन डुबराज बानरा तिकिनः जोनोम पड़सा (गुमुरिया) रे 6 जुलाई 1922 रे होबालेना। भारत दिषुम आजाद अयरते ब्रिटिश काल रे भारतीय सेना इन्फैन्ट्री रेजीमेन्ट बटालियन रे नन कमीशंड लांस नायक किन ताइकेना। खरसवां गोलीकांड रेन प्रत्यक्षदर्शी डुबराज तिकिन सेना रेयः अनुभव ताईकेना मेनते फायरिंग होबायन रे ओबोरेन-ओबोरेन पे मेनते किन मेताको ताईकेना, मेनदो ओकोन को कको ओबोरयना इनकुदो टटकागे गोःए यना। नेन गोलीकांड अयते जी’ड सरेःए यनते 1948 रे टेल्को अप्रेन्टिस रे सलायना किन। मि सिरमा रेयः टेªनिंग पुरा केहते 1949 रे शीट मेटल वक्र्स विभाग रे नियमित ओन्डोः नियुक्ति किन नमकेडा। सिरमा 1982 जोका आकिनः सर्विस पीरियड रे सिरमा 1966-67 रे कम्पनी पायते विदेश रे टेªनिंग लगिड कनाडा सेनोःओ तेयः अवसर किन नमलेडा मेनदो ओवःरे मियडगे कोवा होन मेनते कको सेनोः इरियड किना, एनामेनते एसु नोसिबन अवसर पोचा यना। बिहार राज्य सोमोय रे सामाजिक योगदान दो नेनागे चि जमशेदपुर रेयः बागुनहातु स्थापना समिति रे आकिन संस्थापक सचिव किन ताईकेना एनते हो भाषा ओन्डोः वाराङक्षिति लिपि प्रचार प्रचार रे लको बोदरा तिकिनः सहयोगी किन ताईकेना। हातु दियुरीबासा जोड़ापोखर झींकपानी अयतेन जयंती ईचाःगुटु तिकिनःअ् काजि‘लेकाते टाटा स्टील रेयः ट्राईबल एण्ड हरिजन वेलफेयर सेल पायते 1990-91 रे हो भाषाते प्रौढ़ शिक्षा होबन ताइकेना। इमिता हो भाषा टीचर रुपते रुईवर के रुईवर साईकिल ते पुरा जमशेदपुर रे टयड टयड पा‘ड़व तेकिन बेटनतन ताईकेना। भाषा लिपि रेयः प्रचार प्रचारतेगे 9 नवम्बर 2002 मुसिङ बिरसानगर रे लको बोदरा सायोब तिकिनः सेवारेगे किन दनङ बागेयड-बुवा।
गंगाराम कालुन्डिया
सिरमा 1962 रेयः भारत-चीन सीमा लड़ाई ओन्डोः 1965 रेयः भारत-पाकिस्तान सीमा लड़ाई रे अयः वीरता लगिड 1973 रे महामहीम राष्ट्रपति नीलम संजीवा रेड्डी तिकिनःअ् तिह ते राष्ट्रपति पुरस्कार ओन्डोः सम्मान पत्र ते सम्मानित गंगाराम कालुन्डिया ( आर्मी सर्विस बुक रेदो रामनारायण कालुन्डिया ) तिकिनःअ् जोनोम इलिगाड़ा हातु रे 20 फरवरी 1942 मुसिङ होबालेना। भारतीय सेना रे जुनियर कमीशन्ड अफसर सुबेदार नायक चिमिता हातु इलिगाड़ा तेःए हुजुः उरा यन रे नेले तना चि कुजु गाड़ा रे डेम तोले लगिड इलिगाड़ा हातु लोःओते 19 हातु रेयः नोटिस हुजुः अकाना। नेन हातु को डेम दःअ् रे डुबुईयोः तेयः चिरगल अटाकर केहते विस्थापन रेयः विरोध रे दुब दुनुबको एयोब केनःए। ईचा खरकई बाँध संघर्ष समिति नुतुमते मियड संगठन बईकेहते प्रभावित हातु रेनको एकजुट को तना मेनते चाईबासा थाना अयते अयः नुतुमते अरेस्ट वारंट ओन्डोः कुर्की जब्ती रेयः नोटिस आगु कयते 4 अप्रैल 1982 मुसिङ इदं इदं रे राजनगर थाना, मंझारी थाना ओन्डोः मुफ्फासिल थाना अयते 100 पुलिस बल, सीआरपीएफ 64वीं ओन्डोः 26वीं बटालियन रेन जवान, बिहार मिलिट्री पुलिस ओन्डोः जिला सशस्त्र पुलिस बल बारिया ट्रक, बारिया भेन ओन्डोः मोणेया पुलिस जीप तेको बेटा लेना। आउरि सेताःओ रेगे अयः दुवर टाटी रेको तेगा केडा। ओकोए तनःअ् निमिन सेतःअ् रे मेन मेनते ओन्डोङ यन रेगे कटा रे बंदुक तेको तु´ किजा बटि यन रेदो ट्रक रेको लादी ओडोङ किजा। हातु साई को चिरगल केड रेदो बरकुन्डिया पुल को केसेड केडा। एनरे एसा रेपेःए होबा यना होरा रेयः। मेनदो एनरेयो चनब दो पुलिस कोगे दईयना एन चनब इदु ओकोन मुलि पाहतेको आडकिर किजा ओन्डोः बन्दुक रेयः चाकु कोतेको सोबोःओ गोःए किजा। आयुब तेगे ओवःते अःए शहीद यन तेयः कोबोर बेटायना।