आदिवासी उच्च विद्यालय सीतारामडेरा जमशेदपुर स्कूल रेन संस्थापक सचिव डाॅ. दुर्गा पुरती तिकिन 1948 रेयः खरसवां गोलीकांड मेड ते किन नेलाना। चिमिता सरायकेला ओन्डोः खरसवां उड़ीसा राज्य रे इदि’ई तेयः को नम ताईकेना इमिता जयपाल सिंह तिकिनःअ् ‘आदिवासी महासभा’ पाएते एसु केड़ेःए ते विरोध होबन ताईकेना। इमिता दुर्गा पुरती के जयपाल सिंह तिकिन डिपुटी चीफ रेयः बोजा बा’रि किन ओमई तन लोःते रैली आयोजन रेयः जिमा किन ओमाडिः ताईकेना। जयपाल तिकिनः आन्दोलन सभामंच कोरे दुर्गा पुरती हो ते एसुःए दुरङेया। अयःअ् ओलतड हो दिषुम ओते हसा आन्दोलन रेयः दुरङ ओन्डोः पोरोब पोनई दुरङ रेयः कोरेयः मियड ग्रामोफोन डिस्क रेकार्ड (एच.एम.वी.कं.कलकत्ता अयते) आदिवासी को-आॅपरेटिव सोसाईटियः देंगा ते बई इचि लेडःए।
मेनदो पुरःअ् तेदो रेड रानू कितब लगिड उमिःइ नम केडा। आकिनःअ् विषय रे उमिया कना चि आकिनः रेड-रानू ते बंजि हड़म बंजि बुड़िको जकेड को होन गणा’ना। आकिन ताःरे एना ओतोङ ओन्डोः बुदि ताईकेना चि बर जिह अकन कोवःअ् होन होबन कोरे आॅपरेशन रेयः दोरकर का होबन ताईकेना। नाः जोरोङ कजि ते सीजर तेदो काह नोर्मल डिलिवरी होबाना।
बिना गुरुते रेड्-रनु एतोन नेन ‘आदिवासी देयोंवा’ कितब इमिन नुतुमन ओन्डोः लोकप्रिय कितब ताईकेना चि 1941 (पहला प्रकाशन) रे चपवलेन कितब 1953 रे दुसरा प्रकाशन चपवेते होबायना। चनब दो एना रेयः उमि षड़ि ओन्डोः होबन तन मांग लगिड 1972 रे तीसरा प्रकाशन, 1980 रे चैथा प्रकाशन ओन्डोः 1985 साल रे पांचवां प्रकाशन रिकयते होबायना। नेःए बरसिंह आकिन दनङ यनते कितब नम बायतन हो’ कोवः अरदास लेकाते अयः होन से’ड दनङयन विष्णु पुरती तिकिन मसमत 2006 रे छठवां प्रकाशन हो को तला रेकिन समानङ सोदोर तडा।
बिना गुरुते रेड्-रनु एतोन नेन ‘आदिवासी देयोंवा’ नुतुम कितब रेन लेखक 10 मार्च मसमत 1916 रे हातु तु´बाना टोला बिकरामसाई रेःए जोनोम लेना। जिला स्कूल चाईबासा अयतेन पाटुवा टाटा टेक्निकल इंस्टिच्युट रेकिन पड़वयना ओन्डोः ट्रेनिङ नमकेड ते टाटा कुम्पनी रेकिन नला केना। । अकिन एच.एम.डी.एस.(होमियो) ओन्डोः वैद्य-एल.एम.पी.एच.ए.(आयुर्वेदिक) डिग्री धारी बिहार सरकार सोमोए रे सरकारी वैद्य ओन्डोः रजिस्टर्ड होमियोपैथिक डाक्टर किन ताईकेनाः। आकिन समाज लगिड ओल पड़ाव तेनेसा पईटि पईटितेगे 11 दिसम्बर 1992 रेकिन दनङ यना।
