20 जनवरी 1924 मुसिङ आपुते बोम्बोरो ओन्डोः एंगा ते विरांग कुई तिकिनःअ कोयोङ रे जोनोम नमलेड् सामुचरण तुबिड तिकिन कोल्हान रेन एकमात्र लेखक राजनयिक तनाकिन। आकिन बागे कयते तोरङ ओन्डोः आकिन लेका राजनीतिज्ञ को कको होबायना ओकोए चि एटःअ राजनेता कोवः सम्मान ओन्डोः प्रशंसा रे जा’न लेखको-को ओल तडा। जनजातीय भाषा अकादमी, बिहार सरकार, रांची पायते चपव मसकल अकन पुति “हो को ओन्डोः नेकोवः दिषुम” रे कोल्हान रेन तत्कालीन जनप्रतिनिधि कोवः परिचय किन ओल सगोम तडा। ओल पड़व रे एसु तेज सामुचरण एस.पी.जी. मिशन स्कूल चाईबासा अयते एयोब ऊँकुड़ु पड़व कोदोःए पड़व केना। अयर पाह दो पटना सेनोःयनते पटना विश्वविद्यालय अयते एम.ए. ओन्डोः एल.एल.बी. रेयः डिग्री नमकेड चनब पटना हाईकोर्ट रे वकालत केन टईकेना।
चिमिता अबुवः भारत दिषुम दामुल यना; एन चनब कांग्रेस पार्टी रे जुड़व यनते अगला 60 साल जोका सक्रिय राजनीति रे किन ताईकेना। 1947 रे सबिन को अयते अयर चाईबासा जिला परिषद रे पहला अध्यक्ष किन सलायना। 1954 रे बिहार विधान परिषद रेन सदस्य किन बईयना ओन्डोः 1961 रे बिहार सरकार रे वनमंत्री किन सलायना।
आयुमोःआ चि 1942 रे भारत छोड़ो आन्दोलन इमिता टेक्सटाइल इंस्पेक्टर रेयः नौकरी किन बागे केड् ताईकेना। स्वतंत्रता सेनानी बटुकेश्वर दत्त तिकिन लोःअते एसु जुड़ी किन ताईकेना। 98 साल रेन सामुचरण तुबिड बुदुहर 18 जुलाई 2018 मुसिङ रांची रेयः मियड प्राइवेट अस्पताल रे ईलाज होबन तन रेगे किन दनङ यना।
