‘सेकोर जुउग’ पुति रेयः विमोचन

आबु हो दिषुम रे दःअ-गमा अर्जाव लगिड मियड पारम्परिक इनुङ ‘सेकोर’ चिलिका-को इनुङ आ। इनुङ रेयः नियम चिलिका मेनःअ। सेकोर इनुङ लोःओते आबु हो होनकोवः चेकन सगई मेनःअ ? सेकोर चिलिका नेलोः ओन्डोः चेनःअते बईयोःआ… एमन-एमन एसु किलि-मिलि कोनोःओ कोरेयः हनल नेन कितब रे पड़व ते नमोःआ । पश्चिमी सिंहभूम जिला रेयः तांतनगर प्रखंड रेयः राजस्व मौजा गितिल आदेर अयतेन सेकोर इनुङ प्रशिक्षक ओन्डोः नेन पारम्परिक इनुङ रेयः एसु महत्वपूर्ण जगर सगोम लेखक सत्तीश सामड तिकिन ओलतड पुति ‘सेकोर जुउग’ रेयः विमोचन 18 अप्रैल 2023 मंगलवार मुसिङ सामुदायिक भवन सरायकेला रे होबायना ।

पद्मश्री डॉ जानुम सिंह सोय तिकिनःअ सम्मान रे आयोजित लेन स्वागत समारोह रे हो युवा साहित्यकार हिरला डोबरो बुड़ीउली, सरायकेला-खरसावां जिला उपविकास आयुक्त प्रवीण कुमार गागराई, जिला परियोजना निदेशक संदीप दोराईबुरु, एडवोकेट सुरज पुरती एमन कोवः तड़ाय तिह ते विमोचन होबायना । सेकोर इनुङ रेयः ओतोङ प्रसंग को ओतगुरु लको बोदरा तिकिनःअ ओलपुति ‘षार होरा’, लेखक धनुर सिंह पुरतीयः कितब ‘हो दिषुम हो होनको’ ओन्डोः पद्मश्री डॉ रामदयाल मुन्डा तिकिन ओलतड पुति ‘आदि-धर्म’ कोरेयो पड़वते नमोःआ ।